Fjarhitin komin oman í Gundadal og heldur fram

Gundadalur er nú knyttur upp í fjarhitaskipanina hjá Fjarhitafelagnum.

Tað hendi fríggjadagin, tá John Zachariassen, nevndarformaður í SEV, og Jákup Dam, býráðslimur, skrúvaðu ventilarnar til Gundadal frá.

SEV og Tórshavnar kommuna eiga Fjarhitafelagið.

Henda útbyggingin hevur við sær, at stórir bygningar í næstum verða bundnir í fjarhitaskipanina. 

Talan er um Bank Nordik, Stórhøllina á Hálsi og FSF-bygningin. Seinni í vár verður svimjihøllin í Gundadali eisini knýtt í skipanina.

Nógv orka tøk

Harafturat er klárt á knýta Tórsvøll upp í fjarhitan.

- Framvegis er nógv tøk orka, sum kann leiðast inn í fjarhitaskipanina, og tí verður fjarhitanetið áhaldandi bygt út, so at avlopsorkan frá Sundsverkinum og Brennistøðini á Hjalla verður gagnnýtt so væl sum til ber, sigur Sune Jacobsen, nevndarformaður í Fjarhitafelagnum.

Fjarhitafelagið heldur fram við fjarhitaleiðingini oman eftir Hoydalsvegnum og oman til Finsen, sum verður bundið í fjarhitaskipanina í ár. Aðrir bygninginar í miðbýnum verða eisini knýttir í, har fjarhitin kemur fram við.

Fyri tíggju árum síðani vóru góðir 700 brúkarar í fjarhitaskipanini. Í dag 1100 brúkarar knýttir í fjarhitanetið.