Bretskur dómstólur vil hava Assange handtiknan

Wikileaks-stovnarin hevur biðið dómstólin í London um at sleppa kravinum um, at hann skal handtakast, so hann kann fara av sendistovuni í Ekvador í bretska høvuðsstaðnum, har Assange hevur hildið til í meira enn fimm ár.

Boðini um, at hann skuldi handtakast, vórðu givin, tá Assange breyt regluna um, at hann kundi verða latin leysur móti veðhaldi.

Hann flýddi síðani í sendistovuna hjá Ekvador í London.

Myndugleikarnir í Ekvador góvu honum friðskjól og ríkisborgararætt. Men av tí at bretar hava givið boð um, at Assange skal handtakast, kundi hann ikki fara av sendistovuni í London og víðari til Ekvador.

Svenskir myndugleikar hava fyrr kravt at fáa Assange útflýggjaðan fyri ákærur um neyðtøku. Assange noktar seg sekan í ákærunum.

Í mai í fjør slepti Svøríki kravinum um at fáa Julian Assange útflýggjaðan.