Fýra kommunulæknar við Skálafjørðin

Skálafjarðar læknadømi fær nú ein kommunulækna afturat. Frá at tríggir kommunulæknar hava virkað í økinum, verða teir nú fýra, skrivar Runavíkar kommuna á heimasíðuni,

Borgarstjórarnir við Skálafjørðin og Heilsu og innlendismálaráðið eru komin ásamt um hesa raðfesting, samstundis sum Løgtingið hevur játtað neyðuga peningin.

Kommunurnar í økinum eru samdar um, at nýta verandi viðtaluhøli, í Runavík og á Strondum. Tað hevur ligið í kortunum, at umstøðurnar skulu broytast soleiðis, at rúm verður fyri fýra viðtalum í Heilsumiðstøðini í Runavík, táið koyrandi er ígjøgnum undirstjóvartunnilin. Hetta er framvegis ætlanin. Greitt er kortini ikki hvussu hetta skal skipast fíggjarliga, sigur kommunan á heimasíðuni.

Frá mánadegnum 12. mars 2018 verða allar 4 læknaviðtalurnar mannaðar, skrivar Runavíkar kommuna á heimasíðuni.