Uppskot um at strika 75 ára aldursmarkið

Eftir galdandi skipan er koyrikort, sum verður útskrivað til 18 ára gamlan bilførara, galdandi í 57 ár ella til 75 ára aldur.

Kári P. Højgaard sigur í viðmerkingunum til uppskotið, at grannalondini hava linkað krøvini um koyrikort hjá eldri borgarum, og samanborið við tey hava vit strangastu ásetingar fyri at endurnýggja koyrikortið hjá eldri bilførarum. 

Hann skjýtur eisini upp, at gildistíðin fyri útgivin koyrikort verður 15 ár fyri øll, sama hvat aldurin er.

Sambært uppskotinum skal landsstýrið tó kunna áseta styttri gildistíð fyri koyrikort, um umstøður tala fyri tí. 

Eftir galdandi lóg skulu 75 ára gomul, sum hava koyrikort, til læknakanning annaðhvørt ár fyri at fáa endurnýggjað koyrikortið. Tá tey eru fylt 80 ár, skulu tey læknakannast á hvørjum ári.

Kári P. Højgaard spurdi herfyri Henrik Old, landsstýrismann, um landsstýrið ætlar at gera somu broytingar, sum danir hava gjørt við at taka aldursmarkið av, strika læknakanningina og at hava 15 ára gildistíð.

Svarið frá Henriki Old var, at hann ætlar ikki at taka aldursmarkið av.

Nú hevur Kári P. Højgaard lagt málið fyri tingið.