Nýggjur forseti í Sierra Leone

Tað gjørdist greitt í gjárkvøldið, og endaliga úrslitið vísir tepran sigur til andstøðuvalevnið.

Valið varð hildið 31. mars, og Julius Maada Bio úr Sierra Leone Fólkaflokkinum SLPP fekk 51,81% av atkvøðunum.

Samura Kamara í stjórnarflokkinum Fólkakongressin APC fekk 48,49 % av atkvøðunum.

Ernest Bai Korom hevur verið forsetið í tvey skeið frá 2007, og kann tí ikki stilla uppaftur.

Týdningarmiklastu evnini undir valstríðnum hava verið stríðið móti mutri og fátækradømi.

Andstøðan hevur skuldsett Ernest Bai Korom og ACP fyri mutur og vánaliga leiðslu, og tað hevur Julius Maada Bio lovað at berja niður.

53 ára gamli Bio er penjoneraður hernaðarleiðari. Í 1992 var hann við í hernaðarkvetti, og frá januar 1996 og tveir mánaðir fram var hann leiðari fyri hernaðarjuntuni, sum stýrdi landinum.

Sjey miljónir fólk búgva í vesturafrikanska landinum, og hóast tað er ríkt av mineralum og gimsteinum, so er tað eitt av heimsins fátækastu londum. Á listanum hjá felagsskapinum Transparency Internationel, liggur Sierra Leone á 130-inda plássi av 180 londum.

Almenna úrslitið frá valinum leygardagin hevur verið seinkað, tí ósemja hevur verið um, hvør skipan skuldi brúkast til uppteljingina. Tað merkti, at atkvøðuseðlar frá 11.000 valstøðum ikki vóru upptaldir.

Bio og varaforsetin, Mohamed Juldeh Jalloh, vórðu svornir í eið bara fáa tímar eftir at almenna úrslitið varð kunngjørt.