Eingin ætlan um nýtt skip til Sandoyarsiglingina

Í næstum verður farið undir at fyrireika at bora Sandoyartunnilin, og í hesum sambandi kann verða neyðugt, at Ternan, sum annars røkir Nólsoyarleiðina, ger onkran eykatúr um Skopunarfjørð um náttina á sumri við farmi og akførum.

Men eingin ætlan er um at keypa ella byggja eitt skip aftrat til Sandoyarsiglingina. Tað sigur Henrik Old, landsstýrismaður, í svari til Brand Sandoy í Fólkaflokkinum, sum hevur sett landsstýrismanninum skrivligan fyrispurning um siglingina um Skopunarfjørð.

Brandur Sandoy segði í viðmerkingunum til spurningin, at landsstýrismaðurin í einum kjaki í Kringvarpinum fyrr í ár gav lyfti um, at Ternan skuldi setast í sigling um Skopunarfjørð í summar afturat Teistanum.

Men Henrik Old svarar, at talan í hesum førinum bara kann verða um eyka náttarsigling hjá Ternuni við farmi og akførum.

At byggja ella keypa skip afturat til Sandoyarsiglingina er heldur ikki við í langtíðarløguætlanini hjá landsstýrinum.

Brandur Sandoy vísti eisini á, at um nýggj Nólsoyarferja varð bygd, hevði borið til at seta Ternuna í summarsigling á Sandoyarleiðini saman við Teistanum.

Men Henrik Old sigur, at hetta er ikki rætt, tí í ætlanini um nýggja Nólsoyarferju lá eisini, at Ternan skuldi seljast.

Landsstýrismaðurin í samferðslumálum sigur, at nýggja bíleggingarskipanin á Gomlurætt riggar sum heild væl, og við neyðugum tillagingum fer hon at taka trýstið, sum verður í summar.

Best hevði verið, at bíleggingarskipanin eisini fæst at virka í Skopun, sigur hann.

Henrik Old sigur, at hann ætlar at arbeiða fyri, at eitt nú stórir bilar við farmi, ið hava fyri neyðini at sleppa skjótt um fjørðin, ikki fara aftur um í røðini í bíleggingarskipanini, um t.d. avlýsingar hava verið fyri veður.