Sjóvinnustýrið í nýggjan bygning

Meirilutin í Fíggjanevndini tekur undir við landsstýrinum, men vil tó hava málið lýst so neyvt sum gjørligt, áðrenn niðurstøða verður gjørd fyri at tryggja sær, at kostnaðarmetingin heldur. 

Lógaruppskotið um byggingina, sum kom í tingið fyrst í november í fjør, sigur í mesta lagi 13,7 milliónir krónur. Fíggjarliga heimildin er í fíggjarlógini fyri 2018. 

Sjálv verklagslógin er ikki neyðug, so leingi útreiðslurnar eru í galdandi fíggjarlóg. 

Andstøðan heldur, at tað er bíligari at leiga bygning til Sjóvinnustýrið.

Løgtingið hevur fingið eina ætlan frá privatum at byggja fyri egna rokning og fyri egnan váða.

Andstøðan í Fíggjarnevndini sigur, at Landsverk vísir á, at tær 13,7 millónirnar hava eina óvissu, sum er 40%. 

Í ringasta føri kann bygningurin hjá Sjóvinnustýrinum tí fara at kosta 19,2 milliónir krónur. 

Hendan váðan tekur landskassin á seg, um tað almenna byggir. Um tað privata byggir, liggur allur váðin uttan fyri landskassan, sigur andstøðan.

Smápartafelagið Fastogn í Miðvági bjóðar Sjóvinnustýrinum sama bygning í Miðvági, bygningin hjá Oilwind, sum Sjóvinnustýrið annars rýmdi úr í mai 2016, tí hann var so vánaligur.

Í brævi til Fíggjarnevndina bjóðar Fastogn sær til at útbyggja, umvæla og dagføra bygningin og síðani leiga og selja landinum hann.