Heilsuhjálparar gjørt sáttmála

Kommunala arbeiðsgevarafelagið og Heilsuhjálparafelagið hava gjørt nýggjan tvey ára sáttmála, sum er galdandi til 1. oktober 2019.

Lønarkarmurin er umleið tann sami, sum Kommunala arbeiðsgevarafelagið og Starvsmannafelagið gjørdu fyrr í ár.

Eitt nú hækkar endalønin hjá heilsuhjálparunum 2.000 krónur yvir tvey ár.

Endalønin í gamla sáttmálanum var góðar 23.000 krónur um mánaðin. Um tvey ár verður hon góðar 25.000 kr. 

Bólkaleiðaraviðbótin hækkar eitt vet, og eftirlønin verður nú goldin av førleikaviðbótini, upplýsir Kommunala arbeiðsgevarafelagið í tíðindaskrivi. 

Álitisfólkaskipanin er dagførd, og eisini er avtalað, at partarnir skulu gera ein leist at handfara undantøk í sambandi við arbeiðssteðg.

Hetta arbeiðið skal verða liðugt í seinasta lagi 1. januar næsta ár.

Kommunala arbeiðsgevarafelagið heldur nú fram við samráðingunum við onnur fakfeløg. 

Fyrst á skránni eru Heilsurøktarafelagið, Maskinmeistarafelagið og Skipara- og navigatørfelagið.