Kim Jong-un og Donald Trump lendir í Singapore

Í morgun lendi norðurkoreanski leiðarin, Kim Jong-un í Singapore, har hann millum annað skal fundast við amerikanska forsetan, Donald Trump.

Tað váttaði uttanríkismálaráðharrin í Singapore við eini mynd á Twitter:

Welcomed Chairman Kim Jong Un, who has just arrived in Singapore. pic.twitter.com/ZLK4ouIejx

— Vivian Balakrishnan (@VivianBala) June 10, 2018

Og nú skriva altjóða miðlar, at amerikanska forsetin, Donald Trump, eisini er lendur í Singapore.

Avlýsti annars fundin

Fyri bara fáum vikum síðani avlýsti Trump ætlaða fundin í persónligum brævi til Kim Jong-un. Har skrivaði hann, at Kim hevur víst, at hann hevur ringt sinnalag, og tí er tað óhóskandi at hitta hann.

Men stutt eftir hálsaði Trump um, og síðani kom ein norðurkoreiskur herleiðari á vitjan í USA, og við sær hevði hann persónligt bræv frá Kim til Trump.

Alt er tilreiðar

Hóskvøldið í farnu viku segði amerikanski forsetin á tíðindafundi, at hann kortini ætlaði at hitta norðurkoreanska leiðarin, tí brævið, sum hernaðarleiðarin hevði tikið við til Trump, var bæði inniligt og gott.

Donald Trump vissaði á tíðinda fundinum um, at alt er tilreiðar til fundin, og at hann var tilreiðar at vera longri í Singapore. Harafturat segði hann, at hann fór at bjóða norðurkoreanska leiðarinum til USA, um fundurin gongur væl.

- Eg vóni at fáa viðurskiftini í rættlag, segði Donald Trump og lovaði at bjóða Kim til USA, um fundurin í Singpore í næstu viku eydnast væl.

Søguligur fundur

Fundurin teirra millum er settur at vera 12. juni og verður hildin á frítíðaroynni Sentosa.

Tað er fyrsta ferðin, at ein norðurkoreanskur leiðari hittir ein amerikanskan forseta.

Í amerikonsku leguni vóna tey, at fundurin fer at skunda undir eina tilgongd, har Norðurkorea til sjeyndu síðst gevst við kjarnorkuverkætlanum sínum.