Mæla til at hækka lønina

Mánaðarlønin hjá løgtingsfólkum skal hækka við 5562 krónum um mánaðin, men afturfyri skal skattafría ískoytið á 2000 krónur, sum tingfólk fáa í dag strikast.

Tað er millum tilmælini í álitinum frá bólkinum, ið hevur gjørt eitt álit við tilmæli um lønir og pensjón hjá tingfólkum.

Eisini verður mælt til, at fara frá verandi pensjónsskipan við tænastumannapensjón til eina skipan, har landið rindar 15 prosent av lønarsamsýningini hjá tinglimum í eina góðkenda pensjónsskipan. Í hesum sambandi verður sama skiftisskipan nýtt, sum verður nýtt fyri landsstýrisfólkini í sambandi við, at tey eru farin frá at vinna sær tænastumannapensjón til, at landið rindar 15 prosent av lønarsamsýning teirra í eina góðkenda pensjónsskipan, stendur í tilmælinum

Tilmælið var handað løgtingsformanninum fríggjadagin.

Í bólkinum, sum hevur gjørt tilmælið, sita Jógvan Amonsson, statsaut. revisor, Gunn Ellefsen, advokatur og Mariu á Dul, HR-leiðari.