Stjórar hava ov fáar leiðsluroyndir

Stjórar hava ikki nóg nógvar leiðsluroyndir, tá teir verða settir í starv.

- Teir hava kanska lisið búskap ella løgfrøði, men eru naknir, tá ið ræður um leiðslu. Eisini verða stjórar settir, sum ongar royndir hava.

Tað sigur Eyðbjørn Poulsen, stjóri í Leiðsluhúsinum, í samrøðu við Magistaran, sum er blaðið hjá Magistarafelagnum.

- Tá ið tú verður ovasti stjóri, hevur tað stóran týdning, at tú ikki loypur av niðasta trini í trappuni upp á ovasta trin í einum. 

Leiðsla verður ikki bara lærd á skúlabeinki, men gjøgnum royndir. Tú skalt læra handverkið. 

Ein stjóri eigur at hava roynt at vera eitt nú verkætlanarleiðari og deildarleiðari, áðrenn hann verður ovasti stjóri, sigur Eyðbjørn Poulsen.

Hann heldur, at tú ert ikki egnaður at vera stjóri á einum stórum arbeiðsplássi, um tú ikki hevur í minsta lagi 10 ára leiðsluroyndir.

Eyðbjørn Poulsen sigur, at júst henda støðan er serstøk fyri Føroyar.

- Í øðrum londum loypur tú ikki upp í eitt stjórastarv, um tú ikki hevur leiðsluroyndir frammanundan, sigur stjórin í Leiðsluhúsinum við Magistaran, blaðið hjá Magistarafelagnum.