Stórur áhugi fyri Sjúrðarbergi

Fleiri hava víst áhuga fyri at keypa flakatrolaran Sjúrðarberg hjá JFK-troli í Klaksvík, og um eina viku ella so verður greitt, um trolarin verður seldur.

Tað upplýsir Hanus Hansen, reiðari.

Hann sigur, at tað eru serliga russar, sum hava víst áhuga fyri Sjúrðarbergi, men Hanus Hansen leggur dent á, at eingin sølusáttmáli er gjørdur enn, og eingin av manningini er sagdur upp.

Sjúrðarberg hevur seinastu tíðina verið leigaður út til Grønlands til royndir, sum Grønlands Naturinstitut hevur skipað fyri.

Trolarin hevur eisini staðið á sølulista.

Hanus Hansen sigur, at tað er fyrst og fremst nýggja fiskivinnulógin, við uppboðssølu og menningarkvotum, sum hevur fingið reiðaríið til at gera av at selja Sjúrðarberg, tí grundarlag er ikki fyri at hava tveir trolarar.

Haraftrat er kvotan í Barentshavinum minkað, og útlit eru til, at hon fer at minka uppaftur meira, sigur Hanus Hansen.