Grindin í Sandavági var um 50 hval

Ein grind legði beinini í Sandavági seint í gjárkvøldið. Grindin var funnin tríggjar fjórðingurar úr Trølanípuni seinnapartin í gjár.

Men tað gekk sera striltið at fáa rakstur á hana. Ikki fyrr enn í skýmingini seint gjárkvøldið eydnaðist at halda grindina til í Sandavági. 

Sámal Jákup Jørgensen, grindaformaður sigur við in.fo, at bátarnir, sum róku, mistu ein stóran bólk. Hann metir at grindin er umleið 50 hval. 

Grindin var sleipað til Miðvágs, har hon var merkt og tald upp. Sambært sýslumanninum, so komu seðlarnir út klokkan átta.