Skulu kunna skifta kyn løgfrøðiliga

Í viðmerkingunum vísir løgtingskvinnan á, at uppskotið heimilar, at fólk, hvørs lívfrøðiliga kyn er í andsøgn við kynssamleika teirra, umvegis eina umsókn kunnu skifta kyn løgfrøðiliga. 

At skifta kyn løgfrøðiliga merkir, at tú søkir um at fáa eitt p-tal, sum samsvarar við tín kynsliga samleika, og hetta gevur tvørkyndum møguleika at velja sær navn samsvarandi samleika sínum, fáa nýtt samleikaprógv, koyrikort og pass.

Sonja Jógvansdóttir vísir á, at lógarbroytingin gevur tvørkyndum persónum møguleika í sínum gerandislívi og -virki at liva í samsvari við tað, tey eru, umframt at tað er ein almenn viðurkenning. 

Lógaruppskotið um løgfrøðiligt kynsskifti varð lagt fram í gjár og kemur til 1. viðgerð fríggjadagin í næstu viku.