- Latið tykkum koppsetast fyri meslingar

Landslæknin í Føroyum spurdi í gjár Heilsumálaráðið, um ókeypis koppseting fyri meslingar ikki eisini eigur at vera í Føroyum.

Í Danmark er ókeypis meslinga-koppseting, nú meslingar eru farnir at ganga, serliga í Suðurevropa.

Lars Møller, landslækni, hevur ikki frætt aftur úr Heilsumálaráðnum, sigur hann.

Annars mælir hann øllum, sum ikki hava havt meslingar ella longu eru koppsett, til at lata seg koppseta, fara tey av landinum.

Í gjár mælti landslæknin í Grønlandi, Henrik Hansen, øllum til at kanna, um tey eru koppsett fyri meslingar, fara tey út um ríkisfelagsskapin.

Lars Møller sigur, at ein frágreiðing um meslingar er á veg á heimasíðuna hjá landslæknanum í Føroyum.

Meslingar eru farnir at ganga í Evropa. 

Serliga ringir eru teir í Rumenia, Ukraina, Fraklandi, Grikkalandi og Italia.

Meslingar smitta sera illa. Teir stava frá einum virusi og kunnu tí ikki viðgerast við antibiotika.

Fyri kortum boðaði alheims-heilsustovnurin hjá ST frá, at 41.000 europearar fingu meslingar fyrstu seks mánaðirnar av hesum árinum. WHO sigur, at 37 eru deyð av sjúkuni higartil í ár.

Meslingar kunnu eisini hava sera ring hjáárin við sær.