Innanhýsis ósemja um varskógvaraskipan

Samferðslumálaráðið mælti frá, at uppskotið varð lagt fyri løgtingið.

Kristina Háfoss, landsstýriskvinna í fíggjarmálum, legði uppskotið fram 21.august.

Samferðslumálaráðið heldur fyrst og fremst, at ein varskógvarskipan er eitt arbeiðsmarknaðarmál, sum av røttum hoyrir undir Samferðslumálaráðið.

Ráðið heldur eisini, at ein kanning eigur at gerast fyrst fyri at vita, um brúk er fyri einari varskógvarskipan í Føroyum.

Vísir slík kanning, at brúk er fyri henni, er løgið, at bara miðfyrisitingin og stovnar hjá landinum hava brúk fyri henni.

Samferðslumálaráðið nevnir Danmark, har serliga nógvar varskógvingar hava verið á sosiala økinum hjá kommununum.

Fyri øll

Ein føroysk varskógvaraskipan eigur tí at vera fyri øll arbeiðspláss í landinum.

Samferðslumálaráðið vísir eisini á, at siðvenja er, at partarnir á arbeiðsmarknaðinum sjálvir skipa sini viðurskifti.

Skal ein lóg gerast um arbeiðsmarknaðin, skal hon vera alneyðug. 

Tí skal ein kanning gerast fyrst, sigur Samferðslumálaráðið, sum rætt og slætt mælir frá í brævi til Fíggjarmálaráðið, at lógaruppskotið um varskógvaraskipan verður lagt fyri løgtingið. 

Fiskimálaráðið mælti til, at lands-grunnar eisini koma undir varskógvaraskipanina. Teir eru nú við í uppskotinum. 

Almannamálaráðið hevur ongar viðmerkingar um uppskotið hjá Fíggjarmálaráðnum.