Býráðsfundur um eyka býráðsfund

Tvøroyar býráð fer í kvøld at viðgera áheitanina frá meirlutan í býráðnum, tað eru umboðini hjá Javnaðarflokkinum, um at hava eyka býráðsfund um málið við eldrasambýlinum við Sílá.

Javnaðarflokkurin vil hava Tvøroyar kommnu at keypa ella leiga bygningin.

Sambýlið við Sílá fór illa í illveðrinum í 2011. Kommunan á Tvøroyri vildi ikki sjálv umvæla bygningin, men seldi hann. Bygningurin er síðani bygdur uppaftur, millum annað so hann er egnaður til eldrasambýlið.

1. januar 2015 var eldraøkið lagt út til kommunurnar at umsita.

Bú- og Heimatænastan í Suðuroy fekk tá ábyrgdina av øllum eldraøkinum í oynni.

Bú- og Heimatænastan setti sær fyri at keypa øll ellisheim og sambýlið í oynni fyri meira enn 54 milliónir krónur. 

Eisini sambýlið við Sílá. 

Bú- og Heimatænastan vildi keypa bygningin fyri okkurt um 11 milliónir krónur. Bú- og Heimatænastan avtalaði eisini við eigararnar um at keypa bygningin. Men síðani er onki hent, tí Bú og Heimatænastan er ikki væl fyri fíggjarliga.

Tí vil Javnaðarflokkurin á Tvøroyri hava kommununa at taka um endan í fyrstu atløgu.

Býráðsfundurin á Tvøroyri er klokkan 19 í kvøld. Málið um eyka býráðsfund í samband við sambýlið við Sílá er seinasta á skránni.