Koyrikortið verður app

Danska fíggjarmálaráðið upplýsir, at seinast í 2020 verður møguligt at fáa koyrikortið sum app. Koyrikortið verður sostatt tað fyrsta samleikaprógvið, sum verður talgilt.

Danska stjórnin ætlar, at fólk skulu kunna hava samleikaprógvini uppi á sær, tá tey hava brúk fyri teimum. Og tí hevur stjórnin nú tikið fyrsta stigið til at talgilda tey.

Fyrsta átakið er at gera eina app til koyrikortið, sum skal vera klár innan 2020 er at enda komið, sigur Fíggjarmálaráðið

Plastikkið fer ikki í søguna

Plastikk-koyrikortið fer tó ikki í søguna, tí tað kann brúkast á sama hátt sum higartil.

Appin er sostatt bara eitt ískoyti til verandi skipan.

Danska stjórnin ætlar so líðandi at talgilda onnur samleikaprógv, til dømis heilsukortið.