USA: Russland má standa til svars

OPCW er altjóða stovnurin ímóti kemiskum vápnum.

Mattis segði á tíðindafundi í dag, at USA stendur saman við Bretlandi og Niðurlondum, skrivar Reuters.

Fyrr í dag bórust tíðindi um, at Niðurlond útvístu fýra russarum í apríl. Niðurlendsku myndugleikarnir siga, at teir, vegna russisku fregnartænastuna, GRU, ætlaðu at fremja telduálop á kemiska vápnaeftirlitið, sum heldur til í Haag.

OPCW hevur til endamáls at beina fyri øllum kemiskum vápnum og hevur júst fingið heimild til eisini at avgera skuldarspurningin, tá kemisk álop verða framd.

OPCW kannar kemiska álopið í Salisbury í Onglandi fyrr í ár, har ein fyrrverandi russiskur njósnari var eitt av offrunum. Somuleiðis kannar OPCW fleiri álop í Sýria, har illgruni er um, at ólóglig kemisk vápn hava verið brúkt.

Tá altjóða samfelagið skuldi gera av, um OPCW skuldi fáa heimild til at avgera skuldarspurningin og ikki bara kanna kemisk álop, stríddist Russland av øllum alvi ímóti. Men til fánýtis.

Teir fýra russararnir, sum blivu útvístir, høvdu allir diplomatisk pass, og ein teirra var KT-serfrøðingur. Teirra ætlan var at bróta inn í KT-skipanirnar hjá OPCW, sambært niðurlendsku myndugleikunum. 

Russland hevur støðugt noktað at hava nakað við kemisk álop at gera, bæði í Salisbury og í Sýria.