Fingu bót fyri at sigla við ribbáti

Fingu bót fyri at sigla við ribbáti
Føroya rættur hevur givið einum manni 12.000 kr. í sekt og einum smápartafelag 10.000 kr. í sekt fyri sigling við ribbáti.
 
05.10.2018 - 13:00

Føroya rættur hevur givið einum manni 12.000 kr. í sekt og einum smápartafelag 10.000 kr. í sekt fyri sigling við ribbáti. Hetta var eisini tað, sum ákæruvaldið kravdi.

Teir ákærdu játtaðu seg sekar, men teir hildu sektina vera ov stóra. Teir taka tó við dóminum.

Ákæruvaldið reist hálvan mai ákæru móti skipara á ribbáti og eigaranum í sambandi við eitt óhapp í Skopunarfirði 2.juli í fjør.

Skiparin varð ákærdur fyri brot á kunngerðina um manning á førum, sum eru minni enn 20 bruttotons og sum eru í strandarsigling við upp til 12 ferðafólkum.

Løgreglan frætti um tilburðin, tá ein kvinna varð flutt á Landssjúkrahúsið til kanningar. 

Løgreglan avgjørdi tí at kanna málið fyri at vita, hvussu trygdin hjá ferðafólkum er um borð á slíkum bátum.

Ákæra varð reist, tí manningin bara taldi ein, hóast fleiri enn fimm ferðafólk vóru umborð.

Og hesin eini hevði ikki størra dugnaskaparprógvið í sigling, hann hevði ikki góðkent trygdarskeið fyri sjófólk, og hann hevði heldur ikki heilsuváttan fyri sjófólk. 

Og einki fólk við dugnaskaparprógvi í motorpassing var umborð, hóast báturin hevði størri framtøkumegi enn 100 kilowatt. 

Felagið, sum eigur bátin, Sp/f Rib62, varð ákært fyri brot á kunngerð um byggikrøv og útgerð og annað til smærri vinnufør, tí felagið hevði ábyrgdina av, at báturin sigldi við ferðafólki, hóast siglingarloyvi til ferðafólk ikki var endurnýggjað. 

Er kopiera
Nýggjastu sendingar í ÚV
Týsdag 17. november
Vitan
216375
Týsdag 17. november
Vitan
216297
Mánadag 16. november
Norðurljóð 16.november 2026
215027
Nýggjastu sendingar í SV
Týsdag 17. november
Veðrið
216565
Týsdag 17. november
Dagur og vika við 3-2 - teknmálstulkað
216520
Mánadag 16. november
Veðrið
216486
Mánadag 16. november
Bygdarliv 4 – Eiði
216470
Sunnudag 15. november
Møti hjá Brøðrasamkomuni.
216442

Annað frá KVF