Ikki sett á milliónina

Enn er ikki sett á milliónina, sum er í fíggjarlógini ætlað til at granska tilfarið hjá partafelagnum Beta.

Talan er um tilfar hjá felagnum frá 1977 til 2006. Beta rak átta partrolarar í 30 ár.

Felagið hevur hagtøl fyri øll hesi árini um troløki, troltímar, veiðu og annað.

Kári P. Højgaard, løgtingsmaður, hevur spurt Rigmor Dam, landsstýriskvinnu, um milliónina og granskingina.

Hon svarar, at eingin gransking er byrjað enn. 

Men arbeitt verður við málinum, og í næstum kunnu fólk søkja um at sleppa at granska í tilfarinum hjá Beta. 

Orsøkin til, at málið hevur drigið út, er, at einki tilfar var við, tá tann eina milliónin varð sett í fíggjarlógina, sigur Rigmor Dam.

Hon sigur, at vanliga eru væl undirbygd skjøl við, sum lýsa verkætlanina, pengar skulu latast til. 

Í hesum málinum verða pengar játtaðir til at granska tilfarið hjá Beta. Eingin onnur upplýsing er, sigur Rigmor Dam.
 
Tað var eftir uppskoti úr Fíggjarnevndini, at løgtingið játtaði eina millión krónur til at granska tilfarið hjá P/f Beta.