Marine Harvest kann útflyta laks til Russlands

Marine Harvest í Føroyum sleppur at flyta út til Russlands og hini londini í Euvruasiatisku búskaparsamgonguni, tey eru Kasakstan, Hvítarussland, Armenia og Kirgistan.

Nýggja kryvjivirkið hjá Marine Harvest á Strondum søkti um loyvi at koma á russlandslistan hjá Heilsufrøðiligu starvsstovuni. 

Tá eitt føroyskt virki ætlar sær at útflyta matvørur til Russlands, skal Heilsufrøðiliga starvsstova, eftir at virkið er vorðið løggilt í Føroyum, vátta fyri Rosselkhoznadzor, sum eru russisku veterineru myndugleikarnir, at virkið lýkur øll russisk krøv, millum annað um reinføri.

Hans Jákup Mikkelsen, stjóri í P/f Marine Harvest Faroes sigur við Heilsufrøðiligu starvsstovu, at fyrsta lastin av laksi fer skjótt til Russlands.

75 føroysk virki hava fingið løggilding at útflyta matvørur til ES. Av teimum hava 28 virki loyvi at útflyta matvørur úr Føroyum til Russlands.