Net-trygd skipast í Føroyum

Landsstýrið hevur sett sær fyri, at national net-trygd skal skipast í Føroyum, hava innleiðandi fundir verið við danskar myndugleikar.

Verjumál og national trygd eru ikki yvirtikin øki, og harafturat hava danskir myndugleikar útgerð og serfrøði, sum tørvur er á at samstarva um.

Teir fyrstu tveir fundirnir vóru í Keypmannahavn í gjár.

Ein embætisnevnd úr Fíggjarmálaráðnum og Uttanríkisráðnum í Føroyum kunnaðu danska Center for Cybersikkerhed og Verjumálaráðið um føroysku støðuna og tørvin her, og nýggjur fundur er avtalaður at verða í januar.

Center for Cybersikkerhed varð sett á stovn í 2012 sum partur av fregnartænastuni hjá donsku verjuni. Har arbeiða eini 100 fólk í dag á trimum deildum, eini ráðgevingar- og teledeind, eininet-trygdardeild og á eini cyber-greiningardeild. Center for Cybersikkerhed er ein av seks geirum í fregnartænastuni hjá donsku verjuni.

Nettrygd partur av tilbúgvingini

Í øðrum londum er national nettrygd alsamt størri partur av tilbúgvingini. Javnan hoyrist um cyberálop og -innbrot, og uttan strong og skipað trygdarkrøv kunnu grundleggjandi tænastur í samfelagnum leggjast lamnar. Um illa vil til, so kunnu cyberálop eisini skaka demokratisku grundsúlurnar so sum tjóðartingsval, lemja streymveiting og bankakervi, ella kunnu hakkarar stjala viðkvæmar upplýsingar, so sum politiskar strategiir, persónsupplýsingar ella vinnulívsdulsmál.

Í føroysku embætisnevndini, sum var í Keypmannahavn í gjár vóru, umframt Bjarna Askham, aðalstjóra í Fíggjarmálaráðnum, Leif Abrahamsen, sum hevur ábyrgdina av KT-trygdarpolitikkinum, og Svein Magnason úr Uttanríkisráðnum, tí har hoyra verjumál heima. Føroyska embætisnevndin hitti Thomas Lund-Sørensen,  sum er stjóri í Center for Cybersikkerhed og Thomas Ahrenkiel, sum er aðalstjóri í Verjumálaráðnum.
Og sum nevnt, verða tingingarnar tiknar upp aftur í januar