Nevndin í ognarfelagnum nýggjan lim

Ragnar Joensen, sjálvstøðugur vinnurekandi, er nýggjur nevndarlimur í Ognarfelagi tryggingartakaranna.

Hann varð valdur á eykaaðalfundi fríggjadagin. 

Ragnar Joensen, sum fæst við aling, kemur í nevndina í staðin fyri Birgir Nielsen, sum fór úr nevndini fyrr í ár.

Hini í nevndini eru Aslaug Gisladóttir, forkvinna, Gunn Danielsen er næstforkvinna, Karl Birgir Isaksen, Arni D. Brattaberg eru nevndarlimir og í nevndini eru eisini trý umboð fyri starvsfólkini í Betri.

Teitur Poulsen er eisini farin úr nevndini. Hann fór, tá Ben Arabo var koyrdur sum forstjóri.

Nevndarlimur fyri hann verður tó ikki valdur fyrr enn á aðalfundinum næsta vár. 

Umboðsráðið, 35 fólk, velur seks fólk í nevndina hjá Ognarfelagi tryggingartakaranna.

Tilnevningarbólkurin hjá ráðnum innstillaði tvey fólk til nevndarvalið á eykaaðalfundinum fríggjadagin. 

Ragnar Joensen fekk fleiri atkvøður og varð valdur í nevndina.    

Fólkini í nevndini í Ognarfelagi tryggingartakaranna eru eisini í nevndini í P/f Betri, sum er móðurfelag hjá Betri Banka, Betri Trygging, Betri Pensjón og Betri Heimi.