Føroyar ikki við, tá víst verður til danska ríkið

Hóast hon vísir til danska ríkið, er danska pensjónslógin ikki galdandi í Føroyum.

Fólk, sum búgva í Danmark, men eitt stutt skifti hava búð í Føroyum, fáa bara fólkapensjón fyri tíðina, tey hava búð í Danmark. Føroyar telja ikki við, hóast Føroyar eru í ríkinum, sum lógin vísir til.  

Fyri aðru ferð hevur Søren Pape Poulsen, løgmálaráðharri, í svari til Føroyanevndina hjá fólkatinginum, sum spurdi fyri Sjúrð Skaale, fólkatingsmann, víst til Arbeiðsmálaráðið.

Kanska fær tað svarað, hvussu orðingin "her i riget" skal skiljast í donsku lógini um fólkapensjón.

Arbeiðsmálaráðið er spurt, men hevur ikki svarað enn.

Søren Pape Poulsen, løgmálaráðharri, svarar, at ongar reglur eru um, hvussu tað eigur at skiljast, tá skrivað verður "her i landet" og "her i riget" í donskum lógum.

Tað veldst um, hvør lógin er.