Heðin Mortensen avloysir Henrik Old

Løgmaður hevur gjørt av at tilnevna Heðin Mortensen sum landsstýrismann í samferðslumálum. Tað boðar løgmansskrivstovan frá í kvøld.

Heðin Mortensen hevur drúgvar royndir bæði í lands- og býráðspolitikki, men hevur ongantíð áður verið í landsstýrinum.

Hann varð fyrstu valdur á Føroya løgting í 1998. Seinast í áttati- og fyrst í nítiárunum sat hann í fleiri umførum á tingi sum varalimur.

Heðin Mortensen hevur sitið í Tórshavnar býráð síðan 1973, og millum 2004 og 2016 var hann borgarstjóri í høvuðsstaðnum.

Heðin Mortensen hevur sín fyrsta arbeiðsdag í morgin. Og helst fær hann úr at gera beinanvegin. Fleiri uppgávur liggja og bíða, teirra millum frágreiðingin hjá Landsverki um Glasir, ein tunnilsraðfesting, ið Heðin Mortensen sjálvur hevur havt ein lut í, og ein frágreiðing um vánaliga standin á landsins brúgvum.