Friðarligt, men nógv fólk dottin í hálkuni

Vikuskiftið hevur sum heild verið friðarligt, hóast nógv jólaborðhald hava verið hildin og nógv fólk hava verið í býnum, upplýsir vakthavandi á politistøðini í Havn.

Løgreglan hevur tó um vikuskiftið fingið nógvar fráboðanir um fólk, sum eru dottin í hálkuni, har neyðugt annaðhvørt hevur verið at ringja eftir sjúkrabili ella hjálp til fólkini.

Løgreglan gjørdi í gjárkvøldið og nátt ferðslukanningar kring alt landið. Ein bilførari í Norðoyggjum varð tikin fyri at koyra ávirkaður, og ein annar fær bót fyri at koyra við summardekkum.

Løgreglan hevur eisini verið úti og kannað tey ymisku skeinkistøðini um landið, men har var einki at seta fingurin á, sigur vakthavandi á politistøðini í Havn.