Nýtt uttandura roykiforboð í Svøríki

Roykjarar í Svøríki fara frameftir at hava enn truplari at finna eitt stað at festa sær í sigarettina. Næsta summar verður nýtt uttandura roykiforboð sett í gildi í Svøríki.

Nýggja roykiforboðið forbjóðar royking á ymsum uttandura økjum sum til dømis á uttandurða matstovum og almennum økjum, tað vil siga á spæliplássum, busssteðgistøðum, ítróttaøkjum og jarnbreytarpallum. Tað skrivar svenska Aftonbladet. 

Frammanundan hevur svenska stjórnin fleiri ferðir hert galdandi roykiforboð - eitt nú er tað ikki loyvt at roykja á svensku strondunum.

Tað var tó ein heldur ørvísi atkvøðugreiðsla í svenska Ríkisdegnum. Hóast tað eru meira enn 13 vikur síðan, at val var í Svøríki, er eingin stjórn skipað enn.

Uppskotið fekk 142 atkvøður, meðan 120 atkvøddu ímóti. Svøríkisdemokratarnir og Liberali flokkurin atkvøddu ikki. 

Visjónin hjá stjórnini er eitt roykfrítt Svøríki í 2025, og í so máta gongur tað rætta vegin, tí einans 11 % av svium roykja.

Føroyingar, sum nú roykja minni enn nakrantíð, eru tó fleiri í tali. Nýggjasta Gallup-kanningin vísir, at 20 % av føroyingum roykja. Tó eru tað einans 15 % av kvinnunum, sum roykja.