Vil kriminalisera sálarligan harðskap

Danski løgmálaráðharrin, Søren Pape Poulsen, vil hava sjálvstøðugar ásetingar viðvíkjandi sálarligum harðskapi í revsilógina.

- Sálarligur harðskapur hevur stórar avleiðingar fyri offrini, børn teirra og familjur teirra. Tí vilja vit hava eina sjálvstøðuga áseting í revsilógini viðvíkjandi sálarligum harðskapi, sigur løgmálaráðharrin við danska kringvarpið.

Í løtuni verður arbeitt við ásetingini, sum løgmálaráðharrin vil hava í revsilógina. Pape Poulsen er bjartskygdur um ætlanina, og hann væntar, at lógaruppskotið kann verða samtykt til heyst. 

Endamálið er sambært løgmálaráðharranum, at gera tað greitt, at sálarligur harðskapur er eins ræðuligur og kropsligur harðskapur.

- Eg haldi ikki, at samfelagið viðurkennir hendan trupulleikan, og tí eru vit noydd til at herða arbeiða viðvíkjandi sálarligum harðskapi, sigur ráðharrin við DR.dk. 

Danski Fólkaflokkurin og Sosialdemokratarnir siga seg stuðla ætlanunum hjá løgmálaráðharranum. 

Harumframt ætlar Pape Poulsen at gera ein arbeiðsbólk, sum skal kanna, hvørji onnur tiltøk kunnu vera við til at fyribyrgja sálarligum harðskapi.  

Leiðarin á donsku kvinnukreppumiðstøðini í Keypmannahavn, Lisbeth Jessen, fegnast um ætlanirnar. 

- Kriminaliseringin av sálarligum harðskapi betrar munandi um rættarstøðuna hjá offrum, sum síðani kunnu venda sær til løgregluna, tá tey hava verið úti fyri sálarligum harðskapi, sigur hon.