Háskúlin í Sandoynni fingið grønt ljós

Háskúlin í Sandoynni hevur fingið góðkenning til at fara undir at skipa háskúlaskeið, sum hava eina samanrenning í millum evnini, matlist, tilfeingi, nátturu og náttúrunýtslu. 

Hanna Jensen, landsstýriskvinna í undirvísingar og granskingarmálum, hevur góðkent virksemið hjá Háskúlanum í Sandoynni, boðar Mentamálaráðið frá. 

Talan er um eina royndarskipan í 2019. 

Samstarv

Stýrið fyri háskúlan á Sandi vísir sjálvt á møguleikan at samstarva við eitt nú Fróðskaparsetrið um vitan og um at gera royndir, soleiðis, at tað seinni kann fara at bera til at stovnseta hægri útbúgvingar innan økið. 

Ein annar møguleiki er, at skúlin í Sandoynni samstarvar við Føroya Fólkaháskúla og Ítróttarháskúlan í Suðuroy, so allir tríggir háskúlarnir kunnu bjóða sínum næmingum umbýtisskipanir og vitjanir.

Ein millión krónur eru settar av til virksemið á Háskúlanum á Sandi í ár, sigur Mentamálaráðið.