Rasmus Paludan kann stilla upp til Fólkatingið

Alt bendir á, at ein islamkritiskur flokkur afturat er við, tá fólkatingsvalstríðið byrjar í Danmark í næstum.

Flokkurin eitur Stram Kurs, og oddamaðurin eitur Rasmus Paludan, sum kanska er mest umrøddi persónurin í Danmark í hesum døgum.

53 mótmæli í fjør

Seinasta árið hevur hann hildið óteljandi mótmæli ymsastaðni í Danmark og gjørt vart við sínar atfinningarsomu hugsanir um islam.

Bara í fjør skipaði hann fyri hann 53 mótmælum, har hann er vorðin vardur av løgregluni, sum hevur avbyrgt øki, har hann kann mótmæla. 

Trygdarátøkini í sambandi við mótmælini hjá Rasmus Paludan í fjør og higartil í ár hava kostað danska landskassanum 24 milliónir krónur.

Elvt til kjak um talufrælsi

Fyrr í mánaðinum fingu nøkur nóg mikið og endaðu eina mótmælisgongu, hann hevði á Nørrebro. 

Løgreglan mátti fylgja Rasmus Paludan burtur frá staðnum; men ófriðurin helt fram, og fólk settu eld í fleiri bilar.

Tað hevur elvt til kjak um, hvørt prinsippið um talufrælsi er friðhalgað - eisini fyri sovorðið sum Rasmus Paludan, ið tilvitað provokera muslimar.

Í seinastuni hava fleiri av hansara mótmælum verið avlýstar, tí løgreglan ikki kann veita vissu fyri hansara trygd.

Innlendismálaráðið kannar veljaraváttanir

Orrustan og nógva umrøðan hevur samstundis gagnað hansara flokki Stram Kurs, sum seinasta árið hevur savnað inn nóg nógvar undirskriftir at stilla upp til Fólkatingið.

Og tað er nú hent.

Rasmus Paludan og Stram Kurs hava fingið neyðugu 20.109 veljaraváttanirnar, sum skulu til, váttar Innlendismálaráðið, sambært  Danmarks Radio.

Nú fer ráðið at hyggja váttanirnar ígjøgnum. Tað fer væntandi at taka tvær vikur.