Umhvørvisstovan hevur góðkent Sandoyartunnilin

Sandoyartunnilin hevur nú fingið umhvørvisgóðkenning frá Umhvørvisstovuni. Góðkenningin kann kærast til landsstýriskvinnuni í umhvørvismálum, Sirið Stenberg, í seinasta lagi 7. juni.

Tey kunnu kæra, sum avgerðin um umhvøvisgóðkenning hevur ein serstakan, beinleiðis og persónliga týdning fyri, sigur Umhvørvisstovan. 

P/F Eystur- og Sandoyartunlar, sum hevur nú hevur fingið umhvørvisgóðkennning, skal gera undirsjóvartunnil millum Suðurstreymoy og Sandoy. 

Langur og djúpur

Tunnilin verður 10,8 km langur. Mesta dýpið er 155 metrar undir sjóvarmálanum, og eins og í Eysturoyartunlinum verður mesta hallið fimm prosent. 

Roknað er við at spreingja 800.000 rúmmetrar av gróti.

Endamálið við umhvørvisgóðkenningini, sum nú er latin, er at fyribyrgja og avmarka dálking av náttúru og umhvørvi og ampar, sum kunnu standast av arbeiðinum. 

Ætlanin er, at koyrandi verður í Sandoyartunlinum í desember 2023.