Vantandi viðgerð fyri bróstkrabba

Danska løgreglan hevur skuldsett Region Sjælland og fleiri leiðandi starvsfólk fyri brot á revsilógina og autorisatiónslógina í sambandi við vantandi handfaring av sjúklingum, sum hava fingið ávising frá egnum lækna at fara til kanningar, tí illgruni er um brótskrabba. 

Hetta skal verða hent í árunum 2013 til 2017, - ein yvirlækni á sjúkrahúsinum gjørdi myndugleikarnar varugar við støðuna.

Løgreglan hevur framt fleiri húsarannsóknir í Sjællandi, sum partur av kanningararbeiðinum.

Løgreglan og læknafakligir serfrøðingar hava kannað journalir á Ringsted Sjúkrahúsinum hjá fleiri túsund kvinnum, sum eru kannaðar, og fleiri hundrað kvinnur eru kannaðar umaftur. 

Fyribils er staðfest, at 304 kvinnur hava fingið staðfest bróstkrabba eftir 1. januar 2013, og sum møguliga ikki hava fingið neyðugu kanningarnar, skrivar DR.

Illgruni er um, at kanningarnar ikki hava verið nóg neyvar, tá illgruni hevur verið um bróstkrabba.

Kvinnurnar vóru, eftir tilvísing frá egnum lækna, bara til mammografi á sjúkrahúsinum í Ringsted, hóast reglurnar siga, at lækni skal kannað, um knútar eru í bróstinum, og gera ultraljóðkanning, skrivar DR.

Danka løgreglan vísur ikki aftur, at møguliga verða fleiri skuldsetingar í málinum.