Kannar fyritøkur og tilboð

Tey, sum selja eltól og hvítvørur og senda tilboðsbløð í hvørt hús, eiga at prógva, at prísirnir í blaðnum eru rættir, bæði tilboðið og tað, sum vøran kostaði fyrr.

Brúkaraumboðið hevur nýliga kannað tilboðsbløð hjá tveimum størstu veitarunum, sum selja eltól og hvítvørur í Føroyum.

Hesar stakroyndirnar vístu, at fyritøkurnar megnaðu at skjalprógva marknaðarførdu upprunaprísirnar, sigur Brúkaraumboðið.

Stakroyndir

Fyritøkurnar báðar fingu tó at vita, at Brúkaraumboðið ætlar at halda fram við at gera slíkar stakroyndir. Um upplýsti upprunaprísurin ikki er rættur, er talan um villleiðandi marknaðarføring.

Sambært lógini um marknaðarføring má útsøla ella onnur søla, har prísir eru lækkaðir, bara fráboðast, um príslækkingin er verulig. 

Handlar skulu í minst seks vikur hava havt vøruna til sølu fyri upplýsta upprunaprísin, áðrenn vøran verður seld fyri tilboðsprís. Er talan um gerandisvørur er talan tó um fýra vikur.