Spurt um til ber at hava fund sum skjótast

Forkvinnan í Fiskivinnuráðnum, Jóanna Djurhuus, hevur spurt limirnar i Fiskivinnuráðnum, um til ber at hava fund sum skjótast um fiskidagarnar hjá útróðrabátunum.

Sjey limir eru í Fiskivinnuráðnum.

Orsøkin er, at Høgni Hoydal, landsstýrismaður í fiskivinnumálum, hevur sent Fiskivinnuráðnum eitt uppskot um at broyta kunngerðina, sum ásetir býtið millum fullriknu útróðrarbátarnar í bólki 5A og útróðrarbátarnar í bólki 5B, sum hava útróðurin sum parttíðar vinnu ella sum nýggja vinnu.

Uppskotið hjá landsstýrismanninum er í stuttum um at flyta nakrar útróðrarbátar úr bólki 5B yvir í bólk 5A og lata teir taka fiskidagarnar við sær.

Trupulleikin er, at fiskidagarnir hjá bátunum í bólki 5B eru uppi longu nú, hóast teir skulda vara alt árið.

Sambært uppskotinum hjá Høgna Hoydal, sum hann vil hava Fiskivinnuráðíð at viðgera í skundi, koma 600 fiskidagar afturat í bólki 5B.

Fiskivinnuráðið hevur annars regluligan fund fríggjadagin í næstu viku, tann 19.juli.