Dagførda lógin um rættargang til hoyringar

Føroysk og donsk embætisfólk hava síðani 2017 endurskoðað lógina, sum er meira enn 30 ára gomul.

Stórur munur er á lógini, sum er galdandi í Føroyum, og lógini, sum er galdandi í Danmark, tí danska rættargangslógin er ofta dagførd. 

Nógvar broytingar

Fleiri enn 200 broytingar eru gjørdar í donsku rættargangslógini, sum ikki eru settar í gildi fyri Føroyar. 

Millum annað skal Føroya rættur nú hava dómsfólk. Dómsfólk eru vanlig fólk, sum viðgera rættarmál saman við løgfrøðiligum dómarum.

Í lógaruppskotinum er nýggjur kapittul um ábyrgd hjá landsstýrisfólki. Hann sigur, hvørjar rættargangsreglurnar eru, tá mál eru móti landsstýrisfólkum um embætisførslu teirra.