Skipið mátti keypast

Partafelagið Varðin noyddist at keypa danska uppsjóvarskipið Gitte Henning, fyri at fáa flutt føroysk fiskirættindi yvir á skipið og skráseta tað í føroyska skipaskránni.

Tað upplýsir Varðin á heimasíðu síni. Seinastu dagarnar hava fólk frá Varðanum verið í Skagen í sambandi við, at felagið skal yvirtaka Gitte Henning.

Varðin ætlaði upprunaliga at leiga Gitte Henning fyri Trónd í Gøtu, sum hevur fingið maskinskaða, og verður liggjandi til næsta vár.

Einki upplýst um keypsprísin

Men fyri at flyta fiskirættindi yvir á Gitte Henning, varð neyðugt at keypa skipið, og skráseta tað í føroysku skipaskránni.

Einki verður upplýst um, hvussu nógv Gitte Henning er keypt fyri. Avtala er gjørd við danska reiðaríið um, at tað kann keypa skipið aftur um eitt ár, sigur Varðin.

Av tí tað ikki er greitt, um Gitte Henning verður verandi í flotanum, fer skipið at eita Gitte Henning 1.