Útlendingar skulu duga føroyskt

Tað fer at standa í integratiónslógini, sum landsstýrið er í ferð við at gera. Tað segði Helgi Abrahamsen, landsstýrismaður, í gjár, tá Útlendingastovan tók integratiónsportalin í nýtslu.

Hann segði, at hetta at duga føroyskt er í flestu førum ein fyritreyt fyri, at útlendingar kunnu uppihalda sær sjálvum og vera við í samfelagnum á jøvnum føti við onnur.

Frálæran í føroyskum styrkjast

Men ein treyt er eisini ein rættur, segði Helgi Abrahamsen. Hann segði, at útlendingar, sum flyta til Føroya at búgva, hava rætt til góða undirvísing í føroyskum.

Tí verður frálæran í føroyskum styrkt. Síðan 2012 hava í miðal 46 útlendingar fingið varandi uppihaldsloyvi um árið. Flestu loyvini vórðu latin í 2017, tá vóru tey 71.

Í 2016 vórðu bara níggju loyvi latin, tí tað árið var málsviðgerðartíðin munandi longri enn vanligt. Hetta eru fólk, sum hava annan ríkisborgararætt enn norðurlendskan.