Eiga at raðfesta skúlabókasøvnini

Skúlabókasøvnini mugu fáa hægri raðfesting, so fólkaskúlanæmingar í Føroyum fáa betri lesivanar og mennast meira.

Tað sigur Jacob Eli S. Olsen, formaður í Føroya Lærarafelag, í samrøðu við Skúlablaðið.

- Fáa vit útbúgvið fleiri skúlabókavørðir og raðfest skúlabókasøvnini hægri, so rokni eg við, at hetta fer at síggjast aftur í betri lesivanum, og at vit fáa fleiri dugnaligar næmingar.

- Fara næmingar at lesa meiri, serliga teir sera dugnaligu, so mennast teir fakliga, og tað fer at gera, at vit fara at hava næmingar, sum standa seg sera væl, sigur Jacob Eli S. Olsen.

Eingin útbúgvin í 15 ár

Tað eru 15 ár síðani, at skúlabókavørðir seinast vórðu útbúnir, og fleiri skúlar mangla útbúnar skúlabókavørðir. Nú má útbúgvingin setast á dagsskránna, heldur formaðurin í Føroya Lærarafelag.

Eitt er skúlabókavarðaútbúgvingin, sum leingi hevur ligið á láni, annað er at gera umstøðurnar at hava góð og kveikjandi skúlabókasøvn betri. Tímarnir, sum skúlabókasøvnini fáa, eru alt ov fáir, um líkindi skulu vera fyri, at tey eru námsfrøðiligir kveikingardeplar, heldur formaðurin.

- Ásetingin til skúlabókasøvnini er ein minimunáseting; tað hevur verið frammi til hvørja samráðing at broyta hana, men vit eru tíverri ikki komin á mál, sigur Jacob Eli S. Olsen við Skúlablaðið.