Dregur út at avgreiða náttúrulógina

Nú hevur Rættarnevndin hjá løgtinginum fingið freist til 1.mars at skriva álit um uppskotið um náttúrumargfeldislógina.

Fyrsta viðgerð var í tinginum 11.november í fjør, og tí skuldi álitið verið komið fyri jól.

Men Rættarnevndin bað um og fekk freist til 1.februar at koma við álitinum.

Nú hevur Rættarnevndin biðið um og fingið freist til 1.mars.

Orsøkin er millum annað, at trý uppskot um at broyta aðrar lógir, sum hava samband við náttúrumargfeldislógina, skulu hava fyrstu viðgerð á tingfundinum í morgin.

Rættarnevndin sigur seg kunna skriva álit um øll fýra málini, nú freistin er longd til 1.mars.