Verkfalsgrunnurin kann brúkast til annað

Samtykt varð á aðalfundinum hjá Tofta arbeiðarafelag í gjárkvøldið, at grunnurin hjá felagnum verður ikki markaður til at brúka í sambandi við verkfall burturav.

Harry Benjaminsen, formaður í Tofta arbeiðarafelag, sigur, at nú verður arbeitt víðari við málinum.

Grunnurin verður varðveittur, men pengarnir í honum skulu kunna brúkast til ymiskt felagsarbeiði.

20 ára gamal

Verkfalsgrunnurin kom fyri okkurt um 20 árum síðani. Tá setti felagið stovnsfæ í hann, og ein partur av limagjaldinum hjá limunum fer í hann.

Harry Benjaminsen vil ikki siga, hvussu nógv er í grunninum.

Nevndin heldur, at nú er ikki brúk fyri honum longur, og kom tí við uppskoti á aðalfundinum í gjárkvøldið um at strika avmarkingina um, at grunnurin bara stuðlar, tá arbeiðssteðgur er.

200 limir eru í Tofta arbeiðarafelag.