Corona beindi fyri flogfelagnum Flybe

Bretska flogfelagið Flybe, sum ætlaði at flúgva til Føroya í 2017, er farið í gjaldsteðg. Felagið var so illa fyri fíggjarliga, at nú hevur coronavirusið gjørt av tað.

Felagið gavst at flúgva í gjárkvøldið. Flybe var størsta regionala flogfelag í Evropa. Tað hevði okkurt um átta milliónir ferðafólk um árið.

Men corona hevur gjørt, at eftirspurningurin eftir flogferðaseðlum er minkaður nógv í Evropa. Og tað gjørdi av við Flybe.

Skuldu flúgva til Føroya

Bretsku myndugleikarnir vildu ikki hjálpa Flybe við at læna felagnum pengar. Tvørturímóti kravdi bretska skattavaldið, at felagið rindaði avgjøld, sum tað skyldaði. 2.000 fólk arbeiða hjá Flybe.

Flybe boðaði frá í 2017, at felagið skuldi flúgva til Føroya fyri Loganair. Flybe skuldi flúgva fríggjadag og sunnudag frá 26. mai til eina ferð í september millum Aberdeen og Vágar.

Men ætlanin varð av ongum, sum skilst, tí áhugin fyri leiðini var ikki nóg stórur. Og tað var eisini trupult at útvega ferðafólki hotellkamar í Føroyum, segðist. Flybe hevði annars fingið loyvi at flúgva til Føroya.