SAS sendir 10.000 fólk til hús

Tað upplýsti Rickard Gustafsson, forstjóri hjá SAS, á tíðindafundinum, sum varð hildin hjá SAS í Stockholm.

– Eftirspurningurin eftir flogferðum er steðgaður upp, og ógvusliga minkingin krevur tillagingar, segði stjórin á tíðindafundinum.

Hetta merkir, at 90 prosent av øllum starvsfólkunum hjá SAS verða søgd úr starvi. Tilsamans verða 10.000 størv fyribils niðurløgd.

Missa 80-100 milliónir um dagin

– Sparingarnar eru neyðugar, so flogfelagið kann taka virksemið uppaftur, tá kreppan er av, segði forstjórin hjá SAS á tíðindafundinum.

Skandinaviska flogfelagið, SAS, missir 80-100 milliónir krónur um dagin, nú flúgvingin er rakt, sigur Jacob Pedersen, greinari hjá Sydbank, sambært tíðindastovuni hjá Ritzau.

Tí er umráðandi, at steðga tapinum áðrenn kassin verður tómur, sigur greinarin við tíðindastovuna. Danski staturin eigur 14,2 prosent av SAS, og Svøríki eigur 14,8 prosent.