Landsstýrið skal gera landbúnaðarpolitikk

Løgtingið er samt um at biðja landsstýrið gera ein landbúnaðarpolitikk.

Tað byrjaði við einum uppskoti úr andstøðuni.

Høgni Hoydal og Bjørt Samuelsen í Tjóðveldi hava eitt uppskot til samtyktar um at seta greið mál fyri landbúnaðin í Føroyum.

Vinnunevndin hevur gjørt eitt broytingaruppskot, sum øll í nevndini eru samd um.

Ítøkiligur og realistiskur

Sambært tí skal løgtingið biðja landsstýrið um at gera ein landbúnaðarpolitikk, sum er ítøkiligur og realistiskur.

Dentur skal leggjast á at brúka bø og haga burðardygt og menna føroyskar landbúnaðarvørur.

Framleiðslukrøv skulu setast festarum og krøv skulu setast um útbúgving.

Landsstýrið skal, sambært løgtinginum, koma við einum lógaruppskoti, sum skal fremja settu málini fyri landbúnaðin komandi 10 árini.