Ferðslan tann sama sum undan koronu

Seinasta mánaðin er ferðslan spakuliga vaksin aftur kring landið, og nú er hon á leið tann sama, sum hon var, áðrenn løgmaður gjørdi av at seta ferðina í samfelagnum niður, av koronakreppuni.

Tað vísa seinastu ferðslukanningarnar hjá Landsverki.

Tá boðini komu frá Bárði á Steig Nielsen, løgmanni, í mars, minkaði ferðslan niður í eina helvt av tí, sum hon var.

Tað er serliga persónbilaferðslan á høvuðsfarleiðum, sum t.d. fram við Sundi og við Áir, ið nú er um at verða tann sama aftur. 

Minni ferðsla í Vágum 

Ferðsluteljingarnar fyri Leitisrætt í Vágum, sum er ferðslan til og av flogvøllinum, vísa hinvegin, at ferðslan har ikki er komin up aftur á sama stig enn. Flogferðslan til og úr Føroyum er framvegis avmarkað, og hetta sæst týðiliga aftur í ferðsluni til og av fløgvøllinum.

Samanborið við persónbilaferðsluna hevur lastbilaferðslan ikki verið so nógv merkt av koronutiltøkunum.

Talið av lastbilum fram við Sundi var nærum óbroytt alt tíðarskeiðið, og tað má sigast at vera eitt gott tekin um, at hóast nógv fólk vóru heima, hevur kortini verið gongd í nógvum virksemi hesa tíðina, skrivar Landsverk.