Steðga royndum við koronuheilivági

Tað er tíðarritið, The Lancet, sum hevði eina grein um royndirnar, sum nú boðar frá, at úrslitini eru tikin aftur, skrivar tíðindastovan, Ritzau.

Orsøkin skal vera, at kanningarnar vístu, at heilivágurin, hydroxyklorokin, økti um vandan fyri at fólk við koronu, doyðu.

Tríggir granskarar, sum stóðu fyri royndini, siga, at ov nógv ivamál eru, og tí eru teir givnir við royndunum. Fyritøkan, Surgisphere, vil ikki veita tøl til eina óhefta kanning, vísa granskararnir á.

Ætlaðir heilivágsroyndir avlýstar

Malariaheilivágurin er nógv umrøddur sum viðgerð ímóti korona. Millum annað hevur amerikanski forsetin, Donald Trump, róst heiliváginum, og sigur seg hava tikið heilivágin.

At royndirnar nú eru tiknar aftur, hevur fingið heimsheilsustovnin, WHO, at avlýsa eina roynd við malariaheiliváginum, sum skuldi skipast kring heimin. 

Men WHO sleppur ikki ætlanini um at gera fleiri kanningar við evninum, sigur heimsheilsustovnurin, tí neyðugt er við fleiri kanningum, fyri at fáa staðfest, hvussu heilivágurin virkar, skrivar Reuters.