Skulu ikki sigla við tómum skipum

Tað er umráðandi, at Strandferðslan ikki siglir við tómum skipum. 

Tað er svarið, sum Heðin Mortensen, løgtingsmaður, hevur fingið frá Jørgeni Niclasen, landsstýrismanni.

Heðin Mortensen spurdi, hví túrarnir tilkalling klokkan sjey um morgunin, klokkan eitt korter til seks um kvøldið og leygardag klokkan fimm seinnapart eru tiknir úr ferðaætlanini hjá Strandfaraskipum landsins millum Gomlurætt og Hest. 

0,2 ferðafólk í miðal

Jørgen Niclasen svarar, at hann hevur fingið at vita frá Strandferðsluni, at ferðafólkatalið var 0,2 í miðal túrin hjá Spógvanum á morgni klokkan sjey, tá hann varð settur í fasta sigling.  

Um Hasfjord sigur landsstýrismaðurin, at Hasfjord kann flyta fólk og farm í Hest.

Men tað krevur, at Tórshavnar kommuna betrar atløguviðurskiftini í Hesti eitt sindur, so Hasfjord fær lagt at har. 

Hetta hevur Strandferðslan sagt við kommununa.