Nú verða øll ferðafólk kannað

Dátueftirlitið góðkendi seinnapartin í gjár, at øll, sum ferðast til Føroya, kunnu kannast fyri koronu. Tað váttaði stjórin í Dátueftirlitinum, Eyðhild Skaalum, fyri útvarpinum í gjár.

Sostatt hevur eftirlitið endaliga góðkent avtaluna millum Heilsumálaráðið og Sp/f Thetis, og nú er tvungna skipanin, her øll ferðandi, ið koma til landið, skulu kannast, nú sett í verk.

Avtalan millum Heilsumálaráðið og Thetis er galdandi til og við 10. juli. Í løtuni er kortini ógreitt, hvør skipan verður galdandi eftir tann dagin.

Kannaðu ferðafólk í gjár

Fimm flogfør koma í Vágar í dag; trý úr Keypmannahavn, eitt úr Aalborg og eitt úr Billund, sambært heimasíðuni hjá Vága floghavn.

Heilsumyndugleiknarnir vóru á flogvøllinum og gjørdu kanningar seinnapartin í gjár, áðrenn Dátueftirlitið hevði givið endaligt loyvi til at kanna øll ferðandi, sum koma til landið.

Tí kundu heilsustarvsfólkini á flogvøllinum í gjár ikki krevja, at ferðafólkini lótu seg kanna fyri koronu. 125 fólk søgdu ja, og seks fólk ikki vildu lata seg kanna av ymiskum orsøkum.