Næstan seks milliónir latnar

COVID-19 stuðulin úr landskassanum nærkast teimum seks milliónunum. Tá gjørt varð upp fyrrapartin fríggjadagin, vóru 120 umsóknir avgreiddar.

Stuðulin var tá slakar 5,9 milliónir krónur. Flestu fyritøkurnar, 91 av teimum 120, siga seg hava mist millum 60 og 100 prosent av umsetninginum.

Fyritøkurnar fáa stuðul til fastar útreiðslur, so sum húsaleigu, el, hita, rentur, trygging og fjarskifti. Tær kunnu fáa í mesta lagi 80.000 krónur um mánaðin. 

Størsti stuðulin higartil er 240.000 krónur fyri ársfjórðingin. Miðalstuðulin er slakar 50.000 krónur. Skipanin er longd til 31. oktober.