Nú kunnu fleiri fólk savnast

Í Danmark kunnu nú 100 fólk savnast. Talið av fólki, ið kunnu savnast, er sostatt farið úr 50 upp í 100 í dag.

Yvirlæknin Lars Østergaard sigur, at tað er í løtuni tamarhald á smittugongdini í Danmark.

– Men við størri fólkamongdum er umráðandi at halda fjarstøðu, sigur hann, sambært Ritzau.

Fólk hava sum heild víst virðing

Ríkisløgreglan heldur, at fólk í Danmark hava sum heild víst virðing fyri leiðreglunum um fjarstøðu og reinføri, men í ávísum førum hevur kortini verið neyðugt at leggja uppí og vegleiða.

Miðskeiðis í juni høvdu 836 fólk fingið bót, tí tey ikki høvdu virt leiðreglurnar um, at ikki fleiri enn 50 fólk kundu savnast.

Mette Frederiksen, forsætisráðharri, hevur boðað frá, at gongst sum ætlað kunnu 200 fólk savnast tann 8. august. Í Føroyum kunnu ikki fleiri enn 100 fólk savnast.